[提子食評] 星域餐廳酒廊

好似好耐無食lunch buffet,
所以心血來潮就是但search...search到呢間...

睇左唔夠2分鐘, 就俾openrice既相吸引到決定親自去試下XD

呢間野叫做 星域餐廳酒廊 SkyZone Restaurant and Lounge
位於 銅鑼灣, 珀麗酒店33樓

LUNCH BUFFET正價 $128 (加一)
但如果o係之前既日子去買coupon (與享用buffet不是同一日),
可以 $108 (免加一) 買到一張LUNCH BUFFET coupon (抵!!!)

小插曲:
話說...我放工隻身去買coupon啦...
點知我呢個路痴居然行到差d迷路
好不容易搵到個酒店門口...

我就口震震咁問o個個幫我開門既boy...
"請問...要上33樓, 係唔係由呢度搭車上去架呢??"

佢答我:"係呀, 係由呢度搭lift上去!"

(點樣搭車上到去我都唔知...@口@...er...)

好啦, 講返去食lunch buffet
佢其實係 appetizer (前菜)任食 + dessert (甜品)任食 + 一個 main course (主菜),

記得book位時要同佢講, 要(1)窗口位, (2)卡位(有梳化, 好舒服)
居高臨下, 個view都幾好架^_^
(仲見到o個個好大既"耶穌是主"的巨大霓紅燈背後...其實是人們'曬衫'的熱點!)

時間方面, 我地book左12:30, 食到2:30

服務態度: 十分良好, 有禮, 反應好好

環境方面: 靜靜地(其實o個日都有7成以上入坐率), 幾乾淨, 好舒服!

食物方面: 不錯, re-fill得幾快, 等我遂樣都講下啦...



appetizer (前菜)+ dessert (甜品)
係自助式任食,

有沙律啦(自己拼你想要的啦...), 蕃茄切件, 露筍, 粟米, 火腿,
煙三文魚(okay fresh, 我食左最少5件, haha),
有泰式無骨鳳爪 (encore左2轉, 個人好鍾意食, 呵呵)
牛肉粒(唔錯架, 見到中間有dd生, 但無血, 好靚),
炸魚塊(形狀似麥樂雞, 岩岩炸起, 好好味!),
凍蝦(有殼既中蝦, 但我懷疑我一個人最少都食左半斤...新鮮, 好味^^)
焗芝士西蘭花(香, 熱)

咁有個忌廉湯(不飲也罷o個種), 仲有一個准山豬展湯(我會比較鍾意佢用豬骨...haha)
仲有3款果汁任飲, 都有dd果肉架 (蘋果汁, 橙汁 & 西柚汁), 唔會覺得自己o係度飲糖水

甜品呢,
有紅豆綠茶cheese cake (一般啦...)
仲有xxxxx cake (forget..但都係一般)
最好味係有朱古力cake (面頭有一層厚厚的朱古力醬, 好味!)
仲有個奶油moose cup...好漏, 中上好味啦@@"
有凍紅豆沙 (淡...)
仲有朱古力雪糕同埋綠茶雪糕 (okay架)
水果 - 厚切西瓜, 厚切菠蘿 及 厚切哈蜜瓜 (good~!)

main course (主菜)
要左個煙鴨胸, 都係好好味!! (個size...會令我誤會自己食緊法國菜...)
墊底的薯蓉都好美味 (平時我唔食薯蓉的, 尤其KFC o個d :P)

仲要左個鱸魚~都係咁既size, 好味係好味, 都係鴨胸好d, 呵呵

可惜無影相啦...

最後黎一杯餐飲....
要左檸蜜 (但千萬唔好要...超難飲)
仲有要左咖啡...(okay掛..)

o個日..........直到夜晚10pm都未餓...

如果唔係要求d咩山珍海錯, 呢度都係一個不錯既選擇!