拉花教學(一) ─ 工具

附送：摩卡壼拉花片段

1. 拉花梗係要有咖啡啦
要製作latte art，要使用特濃咖啡，咖啡可以喺義式咖啡機做出嚟，冇嘅話都可以用摩卡壼做出嚟(不過效果無咁好，因為冇CREMA)，順帶一提，一般喺香港買到嘅摩卡壼冇聚壓伐，有心嘅話可以去.SXGX撞下，佢哋間中會有賣加咗聚壓伐嘅BRIKKA，有人問過其他沖煮方式得唔得，我話唔得呀，咖啡唔「帶勁」，淡茂茂，點做得latte

2. 要咖啡新鮮，豆一定要即磨，用義式咖啡機嘅話，磨豆機不防買部好一點，磨豆機係耐用品，隨時長命過幾部咖啡機，用磨卡壼嘅話，手搖磨豆機己經好足夠，而且適用於其他沖煮方式。仲有就係，千祈唔好買砍豆式磨豆機。

3. 跟住梗係奶啦，打奶泡可以有三種方法，(1)義式咖啡機嘅蒸氣，(2)奶泡壼，(3)打奶棒，之後的章節只講述蒸氣，其他的方法只好靠你自己摸索喇

4. 仲有係拉花奶壼，就住每部咖啡機嘅蒸氣壓力同每次製作嘅份量，自行選擇不同嘅大小，一般用0.3L/0.35L或者0.6L嘅奶壼都OK

工具組合

1. 電動磨豆機+咖啡機+拉花壼

2. 電動/手搖磨豆機+摩卡壼+奶泡壼+拉花奶壼

3. 電動/手搖磨豆機+摩卡壼+打奶棒+拉花奶壼

各類工具嘅價錢及銷售點
咖啡機及磨豆機 ─ 一般電器舖嗰啲都唔好買，唔怕貴嘅可以考慮SXGX，買SILVIA可以去S天S，大間嘅泰lin都可以試下，價錢由$1000到$5000甚至過萬不等，仲有就係千祈唔好聽個SALES講嘢，佢哋唔識咖啡架，佢哋淨係識邊部可以分佣多啲，戶日話邊部邊部bar數有幾勁，呃人架。咖啡機喺香港，選擇唔多，以家用機嚟計，呢幾部都算靠得住：Silvia、Krups xp4020、Gaggia evolution、Delonghi EC400

摩卡壼 ─ 有不同大小可供選擇，大約百幾二百蚊，各大百貨公司有售，BRIKKA就要睇彩數嘞，一杯量大約$3XX啦

奶泡壼 ─ 大約$90，各大百貨公司有售，無XX品都有售

打奶棒 ─ 各大十蚊店$10，宜家$12.9，其他百貨公司$70-$80

拉花奶壼 ─ 根據不同大小，由$40至$100不等，上海街有售

仲有係咖啡豆，請不要買咖啡粉，請購買標明烘焙日期嘅咖啡豆，咖啡風味會於烘焙後火速流失，至於理想嘅使用期限，有人話係3至7日，有人話係3-10日，有人話係不超過一個月，眾說紛云，我都唔知邊個啱，還請閣下自己試下自己嘅舌頭可以接受邊種程度

不過除咗電動磨豆機同咖啡機外，其實大部份嘢都可以去北角搵LANDY，品質有保證，仲可以有免費教學同交流，最緊要係有多種咖啡豆可供選擇，亦可配合個人喜好選擇不同嘅烘焙度，即叫即炒，保證新鮮